Ճակատային գծի
բոլոր ուղղություններում

Արցախի ՊԲ-ն հայտնում է, որ տեղային նշանակության մարտեր են ընթանում ճակատային գծի բոլոր ուղղություններում:

«ՊԲ ստորաբաժանումները հաջողությամբ կանխում են հակառակորդի հարձակողական գործողությունները՝ վերահսկողության ներքո պահելով օպերատիվ-մարտավարական իրադրությունը»,- ասվում է ՊԲ հաղորդագրության մեջ:

Օրվա վերջում ՀՀ ՊՆ ներկայացուցիչ Արծրուն Հովհաննիսյանն ասում է, որ ռազմաճակատի տարբեր հատվածներում համեմատաբար մեծ լարվածություն չի եղել:

***

Արցախի Մարդու իրավունքների պաշտպան Արտակ Բեգլարյանը տեղեկացնում է, որ սեպտեմբերի 27-ից ի վեր Ադրբեջանի կողմից Արցախի բնակավայրերի թիրախավորվան հետեւանքով առնվազն 37 խաղաղ բնակիչ է զոհվել, 108-ը՝ վիրավորվել:

«Դիվերսիոն գործողությունների հետեւանքով զոհերի եւ վիրավորների վերաբերյալ որոշակի նախնական տվյալներ ունենք: Հաշվի առնելով ադրբեջանական բանակի ձեռագիրը՝ ռիսկը մեծ է, որ կարող են խոշտանգման եւ սպանությունների այլ դեպքեր էլ լինել, որովհետեւ անհայտ կորած քաղաքացիական անձինք կան»,- ասում է Արտակ Բեգլարյանը:

Նա նշում է, որ վերջին օրերին ավիացիայով եւ հրթիռներով թիրախավորվում են Մարտակերտի, Մարտունու, Հադրութի բնակավայրերն ու քաղաքացիական օբյեկտները, կենսական նշանակության ճանապարհներ, որոշակի պարբերականությամբ նաեւ Ստեփանակերտն է հրթիռակոծվում:

Մնացականյանը հանդիպում է
համանախագահների հետ

Հայաստանի արտաքին գործերի նախարար Զոհրաբ Մնացականյանը Վաշինգտոնում հանդիպում է ԵԱՀԿ Մինսկի խմբի համանախագահների հետ:

Նախարարը խորը մտահոգություն է հայտնում Ադրբեջանի կողմից՝ հոկտեմբերի 10-ին եւ 17-ին կրակի դադարեցման վերաբերյալ ձեռքբերված համաձայնությունների տապալման առնչությամբ եւ ընդգծում է, որ հակամարտությունը ռազմական ճանապարհով լուծելու Ադրբեջանի նկրտումները մարտահրավեր են ողջ տարածաշրջանի համար:

«Ռազմական լուծում չկա»

ԱՄՆ նախագահի ազգային անվտանգության հարցերով խորհրդական Ռոբերտ Օ’Բրայենը բավական կոշտ է նկարագրում իր հանդիպումը Ադրբեջանի արտաքին գործերի նախարար Ջեյհուն Բայրամովի հետ:

Ռոբերտ Օ’Բրայենը

Հայաստանի արտաքին գործերի նախարար Զոհրաբ Մնացականյանի հետ հանդիպման մասին գրառման տոնայնությունը տարբեր է.

«Քննարկել ենք անհապաղ հրադադարի եւ Մինսկի խմբի հովանու ներքո Ադրբեջանի հետ բանակցություններին վերադառնալու անհրաժեշտությունը: ԱՄՆ-ն կշարունակի լրջագույն դիվանագիտական ջանքերը բոլոր մակարդակներում՝ մինչեւ չհասնենք հակամարտության կարգավորմանը»:

Bombardier-ն դադարեցնում է
ավիացիոն շարժիչների
վաճառքը Թուրքիային

Կանադական Bombardier Recreational Products (BRP) ընկերությունը հայտնում է, որ դադարեցնում է ԱԹՍ-ների շարժիչների մատակարարումը «անհստակ գործածությամբ երկրներ»:

Քվեբեք նահանգում գործող BRP ընկերությունը, որն առավել հայտնի է որպես Ski-Doo եւ Lynx ձյունագնացների արտադրող, հայտնում է, որ միայն նախորդ շաբաթ է տեղեկացնել այն մասին, որ Ավստրիայում գտնվող իր Rotax դուստր ընկերության արտադրած շարժիչներն օգտագործվում են թուրքական Bayraktar TB2 ԱԹՍ-ներում:

BRP-ի ավագ փոխնախագահ Մարտին Լանգելյեն Կանադային միջազգային ռադիոյին ասում է, որ տեղեկանալուց անմիջապես հետո իրենք մանրամասն հետաքննություն են սկսել՝ միաժամանակ դադարեցնելով ավիացիոն շարժիչների մատակարարումը «անհստակ գործածությամբ երկրներ»: Լանգելյեն շեշտում է, որ Ավստրիայում Rotax-ի արտադրած բոլոր շարժիչները սերտիֆիկացված են բացառապես քաղաքացիական նպատակներով օգտագործվելու համար:

Ձեւավորումը՝ Աննա Աբրահամյանի, Թամար Դանիելյանի
Էջադրումը՝ Աննա Ալավերդյանի, Աննա Կրուտակովայի
Նախագծի պրոդյուսեր՝ Արա Թադեւոսյան

Այս գլխում օգտագործվել են ՀՀ կառավարության, ՀՀ նախագահի մամուլի ծառայությունների եւ REUTERS-ի լուսանկարները: