Արայիկ Հարությունյանի ուղերձը

Առավոտյան Արցախի Պաշտպանության բանակը հայտնում է, որ տեղային նշանակության մարտեր են ընթանում ճակատային գծի բոլոր ուղղություններում:

Օրվա ավարտին ՀՀ ՊՆ ներկայացուցիչ Արծրուն Հովհաննիսյանն ասում է, որ հակառակորդը Արցախի սահմանի ողջ երկայնքով շարունակել է հարձակողական գործողությունները, իսկ առավել ակտիվ մարտերն ընթացել են հյուսիսային, կենտրոնական եւ հարավային ուղղություններում:

Մեկնաբանելով Իլհամ Ալիեւի հայտարարությունը Ադրբեջան-Իրան սահմանի վերահսկողության լիակատար վերականգման մասին, ՊՆ ներկայացուցիչն ասում է.

«Եթե որոշակի հատվածներում հակառակորդը տեսնում է Արաքս գետը, դա ամենեւին սահմանի վերահսկողության վերականգնում չէ»:

Արցախի նախագահ Արայիկ Հարությունյանը հատուկ տեսաուղերձով դիմում է ժողովրդին.





«Յուրաքանչյուրիս անհատական մասնակցությամբ կկարողանանք պատվով դուրս գալ այս փորձությունից: Ուզում եմ ժամ առաջ, օր առաջ կատարեք ձեր հայրենիքի նկատմամբ պարտքը, հնարավորության դեպքում այն կատարել առաջնագծում:
Սահմանում ձեզ սպասում են ավելի, քան երբեւէ: Սա հայրենական պատերազմ է»,- ասում է նախագահը:

Փաշինյանը՝ խաղաղապահների
տեղակայման մասին

ՀՀ վարչապետ Նիկոլ Փաշինյանն ասում է, որ հայկական կողմի համար ընդունելի է խաղաղապահների տեղակայումը, եւ դրանք կարող են ռուսաստանյան խաղաղապահներ լինել:

«Խաղաղապահների տեղակայումը մեզ համար ընդունելի է: Ես կարող եմ ասել, որ Ադրբեջանի պատկերացումը խաղաղապահների կազմի վերաբերյալ չի համընկնելու Հայաստանի տեսակետնի հետ: Եթե խոսելու լինենք փոխզիջումների մասին, ապա փոխզիջումային տարբերակ կարող է դառնալ ռուսաստանյան խաղաղապահների ներկայությունը:

Նիկոլ Փաշինյանը հարցազրույց է տալիս Ինտերֆաքսին

Ռուսաստանը լավ հարաբերություններ ունի ե՛ւ Ադրբեջանի, ե՛ւ Հայաստանի հետ: Շատ կարեւոր է հաշվի առնել տարածաշրջանային մյուս երկրների տեսակետները, կարեւոր է, որ խաղաղապահ ուժերը կայունացնեն տարածաշրջանը եւ ոչ թե հակառակը», - ասում է Փաշինյանը Ինտերֆաքսին տված հարցազրույցում:

Ալիեւը չի համաձայնի Արցախում
հանրաքվեի անցկացմանը

Ադրբեջանի նախագահ Իլհամ Ալիեւն ասում է, որ պատրաստ է Մոսկվայում հանդիպել ՀՀ վարչապետ Նիկոլ Փաշինյանի հետ, սակայն Ռուսաստանի նախագահ Վլադիմիր Պուտինից հրավեր չի ստացել:

Ճապոնական Nikkei թերթին տված հարցազրույցում Ադրբեջանի նախագահը հավելում է, որ Հայաստանի ներկայիս կառավարության հետ կարգավորման հասնելու հեռանկարը «շատ հեռավոր» է համարում:

Իլհամ Ալիեւը նաեւ հայտարարում է, որ չի համաձայնի Լեռնային Ղարաբաղում ինքնորոշման հանրաքվեի անցկացմանը:

«Ահաբեկիչների հարցը մեր
փորձագետների հսկողության տակ է»

Ռուսաստանի ԱԳՆ խոսնակ Մարիա Զախարովան ասում է, որ Ռուսաստանի համապատասխան կառույցների ռազմական փորձագետները Լեռնային Ղարաբաղում ահաբեկիչների առկայության հարցը պահում են ամբողջական հսկողության տակ:

Մարիա Զախարովան

Պատասխանելով հարցին, թե ի՞նչ իմաստ ունեն Ռուսաստանի կոչերն այն պետություններին, որոնք օգնում են ահաբեկիչներին հասնել այնտեղ, Մարիա Զախարովան ասում է.

«Ռուսական դիվանագիտությունն իր հույսը դնում է այն գործիքակազմի վրա, որին տիրապետում է, եւ դրանք պարզապես հույսեր ու երազանքներ չեն, այլ կոնկրետ աշխատանք: Այն միայն երկրորդ հերթին է բաղկացած հանրային հայտարարություններից, իսկ առաջին հերթին՝ գործողություններից: Այդ աշխատանքում ներգրավված են ռուսական ռազմական փորձագետները: Այդ աշխատանքը, ինչպես հասկանում եք, իր վրա լրացուցիչ ուշադրություն գրավելու կարիք չունի: Հասարակությունը պետք է համոզված լինի, որ աշխատանք է տարվում եւ մենք հրաշալի պատկերացնում ենք հնարավոր հետեւանքները, հաշվարկում ենք դրանք»:

Պուտինի ելույթը

Ռուսաստանի նախագահ Վլադիմիր Պուտինն նշում է, որ հակամարտությունը Լեռնային Ղարաբաղում սկսվել է հայ ժողովրդի դեմ գործած հանցագործություններից:

Այսօր ելույթ ունենալով «Վալդայ» քաղաքագիտական ակումբի հանդիպմանը, Ռուսաստանի նախագահն ասում է.

Վլադիմիր Պուտինը

Միեւնույն ժամանակ, նշում է Պուտինը, «այն իրավիճակը, երբ Ադրբեջանի տարածքի զգալի մասի կորսված է, չի կարող հավերժ շարունակվել»:

«Ես շատ սերտ կապի մեջ եմ նախագահ Ալիեւի եւ վարչապետ Փաշինյանի հետ: Ես նրանց հետ օրը մի քանի անգամ հեռախոսով եմ խոսում: Օրական մի քանի անգամ», - շեշտում է Պուտինը:

Ռուսաստանի նախագահն ասում է, որ «մեր տվյալների համաձայն, ղարաբաղյան հակամարտության գոտում զոհվածների ընդհանուր թիվը մոտենում է 5 հազարին»:

Վլադիմիր Պուտինը նաեւ ասում է, որ Հարավային Կովկասում Մոսկվայի եւ Անկարայի դիրքորոշումները չեն համընկնում:

«Հարավային Կովկասում տիրող իրավիճակի վերաբերյալ մեր դիրքորոշումները չեն համընկնում, քանի որ մենք կարծում ենք, որ, ի վերջո, անհրաժեշտ է այսպիսի վիճահարույց հարցերը լուծել ոչ թե ուժի եւ զենքի միջոցով, այլ բանակցային սեղանի շուրջ: Իհարկե, կարելի է ասել, որ բանակցությունները շարունակվում են 30 տարի, բայց արդյունք չկա: Սակայն իմ կարծիքով, դա չի նշանակում, որ պետք է սկսել կրակել»:

Ձեւավորումը՝ Աննա Աբրահամյանի, Թամար Դանիելյանի
Էջադրումը՝ Աննա Ալավերդյանի, Աննա Կրուտակովայի
Նախագծի պրոդյուսեր՝ Արա Թադեւոսյան

Այս գլխում օգտագործվել են ՀՀ կառավարության, Արցախի նախագահի մամուլի ծառայությունների եւ REUTERS-ի լուսանկարները: